Rev 15 | PTP | STEP | Nang dêc a xê do levac ti gê kɨsii ganê dɨ a xo kɨyang tɨbeac lec. A xê do tiga bêga nêbê angela vɨgê vɨlu dɨ sec yuu, lêc he hôm susu nipaên vɨgê vɨlu dɨ sec yuu wê ob vông xomxo vô nipaên ge vac vɨgê. Buc wê susu nipaên tigee obêc pyap ge od xomxo obêc tulec nipaên ti tii vac lêm, ên xêyaa myavɨnê wê Anutu vông ge ob tɨyôô vac vô buc tige.

Revelation of John 15

Angela vɨgê vɨlu dɨ sec yuu ge hôm susu nipaên vɨgê vɨlu dɨ sec yuu vac he vɨgê

1 Nang dêc a xê do levac ti gê kɨsii ganê dɨ a xo kɨyang tɨbeac lec. A xê do tiga bêga nêbê angela vɨgê vɨlu dɨ sec yuu, lêc he hôm susu nipaên vɨgê vɨlu dɨ sec yuu wê ob vông xomxo vô nipaên ge vac vɨgê. Buc wê susu nipaên tigee obêc pyap ge od xomxo obêc tulec nipaên ti tii vac lêm, ên xêyaa myavɨnê wê Anutu vông ge ob tɨyôô vac vô buc tige.

2 Mêd a xê susu ti tɨyi xocbê gwec levac ge. Gwec tige tɨyi xocbê glas wê he pɨlepac hɨxôn ngwax ge. Dɨ a xê xomxo tɨbeac. Ilage he vông vevac vô bwoc vɨmen hɨxôn i kɨnu yuu naba wê lê yêp lec ge dɨ ngɨnoo i vêl. He le vô gwec wê xocbê glas ge nɨnya, dɨ hôm gita wê Anutu vông vô he ge vac vɨgê. 3 Dɨ he vông lɨlo ti wê Anutu nu yuac Moses vông ilage, dɨ bwoc Sipsip Nu tige vông hɨxôn. Lɨlo bêga bê,

“O Apumtau Anutu, xêkɨzêc kehe ông, yuac vɨhati wê ông vông ge xêkɨzêc, dɨ xe xê dɨ xovô ên xe nêbê ông yuac nivɨha. Ông tu xomxo vɨhati nên king, dɨ môp wê ông vông ge bôbac dɨ vɨxôhɨlôg nôn.

4 O Apumtau, ôcông va tibed wê ông ngɨbua ge. Xomxo vɨhati obêc xona ên ông dɨ pɨmil ông dɨ lam yev vɨxa kɨtu vô ông. Ên môp bôbac wê ông vông ge vɨhati lam le seac mɨ yêp pyap.” 5 He vông lɨlo tyo pyap, nang dêc a xê mag la, lêc xê Anutu xumac ngɨbua sel le taxên gê lag puunê. Xumac ngɨbua tige kehe bêga nêbê kɨyang wê Anutu vông ge vô nôn lec. 6 Mêdêc angela vɨgê vɨlu dɨ sec yuu wê hôm susu nipaên vɨgê vɨlu dɨ sec yuu vac vɨgê ge, he lop vac Anutu xumac ngɨbua tige. He vɨnyum ngakwi kwem wê paha ge, dɨ vêx let gol lec yagtôv xôn. 7 Mêdêc lɨlii mavɨha yuudɨyuu gee, ti vông pɨle gol titi vô angela vɨgê vɨlu dɨ sec yuu gee, dɨ Anutu wê ob dô mavɨha luta lêc luta ge, xêyaa myavɨnê wê i vông ge pup lec pɨle gol vɨgê vɨlu dɨ sec yuu gee mya. 8 Mêdêc ngwaxlu lam vac xêseac yuu xêkɨzêc wê Anutu vông ge dɨ lam pup vac xumac ngɨbua nɨlô, om xomxo ti o tɨyi wê ob la vac xumac ngɨbua nɨlô ge lêm. Lêc angela vɨgê vɨlu dɨ sec yuu gee ob vông yuac lec susu nipaên vɨgê vɨlu dɨ sec yuu ge pyap lê, lêc xomxo ob la vac xumac ngɨbua nɨlô tige tɨmuên.